DISFRACES QUE CONQUISTEN LA URBE

Premios pa «Telva, Pinín y Pinón» y «Legoland» en Uviéu, Xixón y Avilés

Abril 2014 / EL FARÍN

PAULA FERNÁNDEZ (Peñes)

Dellos grupos de neños conquistaron les principales urbes (Uviéu, Xixón y Avilés) con disfraces ecolóxicos. Los alumnos de segundu de Primaria recuperaron, xunto a la «profe» (Ana Isabel, alma máter de la iniciativa) la esencia d’ún de los tebeos más asturianos y algamaron un total de 850 euros. «Telva, Pinín y Pinón, del colexu Poeta Antón» cautivaron al xuráu d’un concursu d’antroxu d’El Corte Inglés (Avilés) y llevaron un cheque regalu de 200 euros. Dos díes depués, fueron a un certame n’El Carbayedo (Avilés) y volvieron a ganar. Nesta ocasión, el premiu foi de 100 euros y una placa conmemorativa. Pero la mayor recompensa llegó’l llunes d’antroxu cuando recibieron los 550 euros del primer premiu de grupos y charangues nel centru comercial El Atrio.

Amás de la mayestra, los padres tamién se volcaron. Ficieron los disfraces con bolses de plásticu y hasta construyeron un impresionante madreñoxiru con corchos qu’adornará la escuela Poeta Antón de recuerdu.

Otru conxuntu del San Félix trunfó con disfraces fechos con material reciclao. «Legoland» calcó los personaxes del popular xuguete de bloques interconectables con cartón, forespán y pintures al agua. Los 15 pequeños metiéronse darréu nel papel de pirata, vikingu y enfermera, ente otros. Otra vegada, El Corte Inglés (centru de Xixón) premiólos con 200 euros que consumieron al instante en xuguetes.

Díes más tarde, trunfaron ente’l xuráu del desfile infantil de disfraces celebráu nel Teatru Prendes la tarde del 4 de marzu. Nesti certame tamién hebo premiu pa dellos bebés que, xunto a sos madres, vistieron un orixinal disfraz de caxa de palomites. La selmana siguiente, «Legoland» recibió otros 200 euros porque quedaron terceros nel Palaciu de los Neños (Uviéu).

La maxa del cine y el bosque, temática en Lluanco. (E. F.)

Personaxes de cómic. (J. E. F. PANDIELLA)

El conceyal de Deportes entregó-y la placa conmemorativa. (J. A. L.)

El conceyal de Deportes entregó-y la placa conmemorativa. (J. A. L.)

Beatriz Fernández, madre d’ún de los integrantes, foi la cabeza pensante. Y ye que-y presten les manualidaes, como amosó en marzu de 2013 cuando fizo una falla con miles de corchos de sidra pa la peña «La Palmereta», qu’algamó’l premiu d’ornamentación en Puerto Sagunto (Valencia).

Los aplausos tamién llegaron de casa a pesar del temporal. Otra peña foi colos sos fíos disfrazaos de pieces Lego al Desfile d’Adultos por Grupos de Candás. El xuráu premió la so creatividá y valentía de participar un día con tanta lluvia, vientu y foles. Alain Fernández, xerente de Teatru Prendes, repartió los 1.200 euros ente esta panda y otra que diba de los cómic pop-art. Hebo más tebeos de carne y güesu. Los más pequeños de la escuela de 0 a 3 de Candás tresformáronse nel llibru de ¿Dónde está Wally?

Los centros de Gozón desfilaron per Lluanco’l 6 de marzu porque’l mal tiempu pospuso la cita. Alumnos de La Vallina, La Canal y el Colexu Rural Agrupáu Cabu Peñes xuntáronse per primer vegada pa disfrutar del antroxu vistíos de personaxes máxicos del monte (curuxos, elfos, árboles, ranes, abeyes...) y de protagonistes de películes tan conocíes como La Guerra de les Galaxes o Grease.