LLORIENZU

CALIENTA’L BRANU

El buen tiempo animó les primeres fiestes de la época estival en Peñes anque l’orbayu apaeció en San Xuan

Xunetu 2014 / Espigón

PAULA FERNÁNDEZ

(Peñes)

Llorienzu calienta’l branu na Comarca. El buen tiempu animó les primeres fiestes y eventos culturales celebraos en Peñes en xunu, anque l’orbayu apaeció na nueche de San Xuan. Eso sí, les fogueres quemaron como davezu en La Ribera de Lluanco. La de Candás estrenó sitiu, yá que se fizo n’El Prao de Gervasia, y la villa vecina tuvo por partida doble, yá que’l fueu y unos globos lluminosos salieron de la zona de la ilesia, dalgo que pa los lluanquinos foi un espectáculu «muy guapo y elegante», comentaben.

Una de les primeres romeríes de la temporada festiva foi San Antonio en Candás. El sol foi’l protagonista principal, dalgo que sorprendió a los romeros, yá que llevaben munchos años ensin poder disfrutar de la rifa nel prau y demás eventos con llorienzu rescamplando en cielu. Llamó l’atención nos xuegos tradicionales l’apaición d’una muyer, Luisa Prendes, que demostró la so fuerza na carrera de llecheres. Esi fin de selmana hebo otros eventos na villa olímpica, como l’alcuentru d’encaxeres na antigua fábrica d’Ortiz.

Yantar en Gozón. (E. F.)

Xeneración del 66. (E. F.)

Prendes, demostró la so fuerza na carrera de llecheres. (L. V.)

El primer fin de selmana del branu (del 20 al 22) festexáronse munchos eventos na Comarca, nos que’l sol llució en cuasi tolos díes. El Mercáu Clarinianu, la Concentración de Motos Clásiques y la gran alfombra del Corpus en Candás, asina como l’alcuentru de mayores en Balbín tuvieron muncha xente. Y ye que’l bon tiempu animó a los vecinos a salir de casa.

San Pedro n’Antromero, una de les cites imprescindibles nel calendariu festivu, nun defraudó l’últimu fin de selmana de xunu. Toca garrar fuerces, porque queda per delantre muncha romería por disfrutar y otros tantos eventos culturales y deportivos a los que dir.

Ente una cosa y otra, les pandilles aprovecharon pa xuntase como la xeneración del 66, que recordaron anécdotes de la etapa escolar el 21 de xunu. El convite, que celebraron nel restaurán Santarúa de Candás, foi de lo más animao.