Númberu 112. Setiembre 2014

Medaya a la

primera nel Seya

Marina García y Raquel Santos, piragüistes cadetes de Los Gorilas, algamen el bronce na so primer incursión nel descensu multitudinariu

Setiembre 2014 / Deportes

PAULA FERNÁNDEZ (Candás)

Ye’l descensu más multitudinariu, pero dalguna qu’otra medaya cayó en novatos. Bastó una edición pa xubir al podiu. Marina García Muñiz y Raquel Santos Fernández algamaron el bronce na categoría cadete na so primer incursión na 78 edición del Seya del 9 d’agostu. Y ye que yá’l so entrenador calificara a la pareya como «un K-2 que promete» y demostrólo. Entraron na meta allugada en Llovio con una marca d’una hora y 18 minutos.

Entrambes lleven tres años como compañeres de remu. Santos Fernández, d’Uviéu, ye la que lleva más tiempu entrenando con Los Gorilas, por ello, siempres va na parte delantera de la embarcación marcando’l ritmu de la remada. Sicasí, nel Seya ocupó la so posición García Muñiz. A pesar de los cambeos y la falta d’esperiencia nel Descensu, llograron otru metal más pal medayeru de Los Gorilas.

La emoción y los nervios fueron la tónica dominante enantes d’entrar n’agua, tres los versos de Dionisio de la Güerta. «El pregón fue muy emocionante», diz la candasina, mientres que la so compañera recuerda que «estaba nerviosísima cuando sonó el himno de Asturias. Tenía ganas de coger la piragua», almite.

Los primeros momentos del Descensu del Sella fueron caóticos, como de costume. «No sabíamos dónde ir porque había muchísima gente», comenten. Abondo ye que la prueba cuntó con 644 embarcaciones nes que remaron 895 palistes de 17 nacionalidaes distintes. Una vegada n’agua, les moces fixeron un güecu ente tanta piragua y solo entornaron nuna ocasión. «Nos daba mucho respeto esta competición porque suele haber muchos accidentes», comenten. Pero elles tuvieron la suerte d’evitalos.

Así de felices taben. (JORGE CUERVO)

Esti K-2 yá dio munches allegríes al club candasín. Son les vixentes campeones d’Asturies en 1.000 metros y la pasada temporada quedaron segundes. Amás, apocayá llevaron la plata na XI Regata Internacional San Agustín d’Avilés, celebrada’l 12 d’agostu. Agora, el mirar d’estes dos palistes de 15 años céntrase en «quedar entre las cinco primeras en el campeonato de España», que se va celebrar na primavera de 2015. Anguaño entraron sétimes en meta, pero esperen ameyorar tiempos na próxima ocasión, yá que daquella van ser cadetes de segundu añu.

Los trunfos nun lleguen solos. Entrenen tolos díes, ensin fuelgu, ente hora y media y dos hores nel branu, mientres que n’otres estaciones tienen una xornada llibre a la selmana.