Número 115. Avientu 2014

Una de les sales del Centru Polivalente «La Baragaña» va convertise nel VIII Mercadillo Solidario. (P. F.)

SOLIDARIDÁ PRE-PASCUA

Carreñinos y gozoniegos lleven alantre iniciatives de toa

mena enantes de Navidá p’ayudar a colectivos desfavorecíos

Avientu 2014 / Especial Navidá

PAULA FERNÁNDEZ (Peñes)

Movimientu solidariu enantes de la Pascua. Distintes agrupaciones de Carreño y Gozón lleven alantre iniciatives de toa mena enantes de Navidá con un oxetivu de mancomún: ayudar a colectivos desfavorecíos.

Los vecinos de Mazaneda van aprovechar les sos fiestes de La Purísima, del 5 al 8 d’avientu, pa recaldar fondos pal proyectu «Toos con Elena», una neña asturiana de nueve años que tien el síndrome de San Filippo. El restu de xornaes festives nesta parroquia gozoniega van cuntar con actividaes pa tolos públicos.

Les celebraciones van arrincar con un concursu de brisca la tarde del 5 d’avientu. A otru día, va ser el campeonatu de bolu batiente, a les cuatro, que va dar pasu a la III Noche del Terror, a les 22 hores. Una hora dempués va actuar Assia. El día 7 va celebrase l’actu solidariu, un desfile de moda infantil p’ayudar a Elena Barreiro Cienfuegos. A les nueve de la nueche, va tocar celebrar les II Jornadas Gastronómicas de los callos artesanos y dos hores dempués, verbena al cargu del Grupo Taxi. El llunes 8 va haber misa a les 12 y media, con puya de la xata, sesión vermú y rifa de mariscu a les dos de la tarde. A partir de les cinco y media, amagüestu y mayada tradicional. Van cerrar los actos Anabel Santiago y David Varela.

Mazaneda va siguir con más actividaes n’avientu. El día 20 tienen prevista una cena-baille de Navidá en La Fustariega (Verdicio). Los vecinos tienen qu’apuntase pa dir en Casa Belarmino, na farmacia «Amelia» o na barraca de les fiestes, hasta’l 13 d’avientu.

L’asociación Muyeres d’El Enlaze va festexar Santa Leocadia. El 6 d’avientu, a partir de les ocho de la tarde, «Las Atrevidas» van representar la obra de teatru «Petición de mano» nel local social. A otru día, van tener una comida nel mesmu llugar por cuenta d’esta festividá.

VILLA DE CANDÁS F. S.

«La Xente» de Santiao d’Ambiedes, pela so parte, promueve una campaña de recoyida d’alimentos a favor de Cruz Roja Gozón. Esta iniciativa solidaria va arrincar a los cinco de la tarde del 8 d’avientu y va rematar dos hores dempués. Nesi tiempu, va tar abiertu’l local de l’asociación, allugáu nes escueles de la parroquia.

El Villa de Candás Fútbol Sala celebra un partíu solidariu’l día 13 a partir de les seis de la tarde. Esa xornada de Liga, na que s’enfrentarán al Rodiles, los asistentes aportarán el so granu d’arena.

Envede pagar entrada pa velos xugar nel polideportivu, los neños entregarán un xuguete y los adultos un quilo de comida non perecedero. Lo recaldao donaráse a asociaciones qu’ayuden a les persones con problemes económicos.

Nel partíu, el Villa rifará ente’l públicu equipaciones del equipu, balones y una cesta con productos navidiegos.

La Comisión de Festeyos d’Antromero nun queda atrás. L’añu pasáu compilaron xuguetes para los neños de la Comarca. Baxo’l lema «tu aportación es muy importante», nesta ocasión fadrán lo propio pero recoyerán cebera y productos d’aséu pa bebés, del 12 al 19 d’avientu. Los establecimientos pa dexar los materiales tán repartíos ente Lluanco, Antromero y Candás. Asina, na capital de Gozón son: Carnicería García, Minymás, Centro Geriátrico Luanco, Zapatería Nika y Arcam. En Candás, collaboren cola iniciativa Cúcate y Sueña, Peluquería Cris, El Tranqueru, Instalaciones Barrera, Carnicería García (cai Armando Palacio Valdés) y la escuela «La Marinera». L’estancu La Flor y «El Choli» sedrán puntos de recoyida n’Antromero, amás de la escuela, qu’abrirán el día 14 pa esi fin.

El polideportivu Jenaro Fernández Diego va acoyer unu de los eventos más movíos, a partir de les 11 de la mañana del 14 d’avientu. El complexu lluanquín va ser l’escenariu d’un maratón de zumba onde los asistentes a esta clase de dos hores tendrán qu’apurrir un quilo de comida.

Una de les sales del Centru Polivalente «La Baragaña» va convertise nel VIII Mercadillo Solidario, impulsáu poles moces candasines Ana Álvarez, Goretti Alonso y Andrea Izquierdo, cola collaboración d’un grupu d’amigos. Los fondos recaldaos van dir a la ONG Seronda, amás de p’ayudar a la escolarización de neños inmigrantes en Fuerteventura. Amás, van recoyer comida que van donar a Cruz Roja de Candás.

El mercadín va tar abiertu del 19 al 22 d’avientu, ente les 11 de la mañana y les siete y media de la tarde. Los cazadores de Gozón van arrexuntar pel so llau alimentos pa Cruz Roja de Lluanco, pa lo que van abrir la so sede en Mazaneda hasta’l 20 d’avientu.

El Teatru Prendes volverá ser l’escenariu de la Operación Kilo, a partir de los cinco de la tarde del 22 d’avientu. Esta recoyida d’alimentos, auspiciada pola Banda de Música de Candás en collaboración con Cáritas, cuenta cola novedá de que se suma a les actuaciones el Coro de la Bodega. Les dos formaciones musicales van actuar a partir de les siete y media de la tarde, cola interpretación de villancicos. En resume, un cientu d’eventos p’apurrir un granín d’arena y ayudar a los colectivos más desfavorecíos, pa que tol mundu puea pasar una Navidá feliz.