116_villa_candas_fs

Númberu 116. Xineru 2015

El club candasín de fútbol sala ta a nada de finiquitar la primer vuelta de la Lliga con escelentes resultaos. (P. FERNÁNDEZ)

El Villa, en busca del alirón

El club candasín de fútbol sala va primeru na

Segunda División, ensin perder ún partíu hasta la fecha

Xineru 2015 / Deportes

PAULA FERNÁNDEZ (Candás)

El Villa de Candás busca’l suañáu alirón que los lleve a la Primer División Rexonal. El club candasín de fútbol sala ta a nada de finiquitar la primer vuelta de la Lliga con escelentes resultaos: nun perdieron ún partíu. Ganaron en 10 ocasiones y empataron nuna. Por eso, lideren la clasificación.

L’equipu, fundáu en 2006, cunta esta temporada con delles cares nueves, ente elles, un entrenador, que nun teníen l’añu pasáu. Los mesmos xugadores tuvieron qu’arreglase pa marcar unes directrices de xuegu. Diego Luis Virosta desempeña esti papel ayudáu de José Luis Carrión y Juan. Los tres conformen el cuerpu técnicu del club.

La plantiya tuvo delles baxes y, consecuentemente, nueves incorporaciones que fixeron más sólidu’l conglomeráu. Asina, estrenaron la equipación de la Villa de Candás seis fichaxes de la zona: Pedro Martínez, Ignacio Díaz (ex porteru del Candás C. F.), Marcos Rodil, Enol Cosío, Daniel Fernández Lozano, Miguel Aramedi «Muñe» y Enrique Montoto. Estos xugadores militaron n’equipos de fútbol sala, fútbol o balonmano en temporaes anteriores y, agora, esperen faese al grupu pa xubir de categoría.

El Villa de Candás tien potencial pola calidá del so xuegu y los resultaos, pero tamién pola so afición. Cunten con cerca de 350 socios que paguen una cuota añal de 10 euros. Los patrocinadores completen el sofitu pa sacar alantre la entidá añu tres d’añu. El pub El Pirata, El Xigrín, Pasarela, Helados Helio Hermanos, Limpiezas Pábel, Creisi, La Estación, Limpieza Cabo Peñas y cafetería Armu sufraguen los gastos de les distintes equipaciones del club.

Amás d’estos establecimientos, otros negocios de la zona collaboren económicamente al club cada añu.

ARRIENDU

DE CANCHES

El club vive esta temporada una bona racha en tolos sentíos. Sicasí, empezó la pasada campaña coles cuentes nuna situación complicada. El presupuestu añal del club ronda los 10.000 euros, ente’l preciu de les fiches (1.800), los árbitros (unos 1.500) y 2.500 d’arrendar les canches del polideportivu.

Nesti sen, la directiva va intentar mediar col Conceyu de Carreño pa buscar alternatives: una medría de la subvención municipal que reciben (agora ronda los 400 euros) o alcordar un descuentu nel arrendamientu del espaciu del polideportivu. L’oxetivu ye poder tar meyor en cuestión de dineru. Confíen en que la bona relación que caltienen tanto col Consistoriu como col Patronatu dea los sos frutos y lleguen a un consensu pa la bona marcha de la entidá.

El Villa de Candás va gasayar a los suyos con dos partíos en casa n’honor a los neños y a los socios a final de temporada. Van participar nun sortéu por cada entrada.

Mentanto, van siguir disputando les xornaes de lliga que resten. Esperen que l’afición sofite al equipu pa siguir llabrando los resultaos consiguíos hasta agora y rematar l’esperáu ascensu a Primer División Rexonal.

Esta entidá deportiva entamó n’avientu una recoyida d’alimentos y de xuguetes. Arrexuntaron cerca de 200 quilos de comida que donaron al Bancu d’Alimentos, amás de dellos lotes de xuguetes pa los neños necesitaos. Esperen repitir la esperiencia solidaria n’otres ocasiones p’ayudar a persones en situaciones complicaes.