Dos de los vehículos afectáos pola conducción temeraria. (P. L.)

Xunu 2015 / Carreño 

PAULA FERNÁNDEZ (Candás)

Les autoridaes tán tres la pista d’un conductor que supuestamente causó un accidente múltiple na AS-110 (carretera de Candás a Tabaza) y fugóse ensin asistir a los mancaos. Los testigos rellataron que, alredor de la una de la tarde del 10 de mayu, un coche de color claro, probablemente fuera de marca Mercedes, diba a gran velocidá, de manera temeraria.

El conductor del vehículu en cuestión, diba en dirección Tabaza, foi a faer un adelantamientu y, nel camín, pegó contra’l retrovisor d’un Renault Laguna que circulaba en sentíu contrariu. Al volver al so carril, cutió contra una motocicleta y un Peugeot 406. Llueñe de parar el coche pa saber l’estáu del restu de conductores, diose a la fuga a una velocidá grande, según los testigos.

La Policía Local allegó al llugar onde asocedió esti múltiple accidente avisaos pola Comandancia de la Guardia Civil de Xixón. Los mancaos, pela so parte, tuvieron que riquir d’asistencia médica, sobre manera’l que diba en motocicleta, qu’ingresó nel Hospital de Xove polos golpes que recibió nel accidente.

MENOR

La Policía Local denunció a un gozoniegu de 17 años ante la Fiscalía de Menores por robar un estintor. Un axente vistíu de paisanu vio al mozu nel mediudía del 17 de mayu col oxetu robáu, caminando pela cai Barceloneta en dirección a l’avenida de la Constitución, y darréu escontra’l parque infantil de Les Conserveres.

La patrulla, que taba al altor de la ilesia de San Félix, atopólu rápidamente, anque trató d’escapar de los axentes pa evitar la so identificación.

Cai la Banda del Cobre

Una patrulla de la Guardia Civil de Candás garró in fraganti a la «Banda del Cobre» nes instalaciones d’ArcelorMittal al altor d’El Cotarón (Llorgozana), a les seis y media de la mañana del 29 d’abril, hora a la que munches de les empreses de la zona yá tán n’actividá. Los individuos diéronse a la fuga al decatase de la presencia policial. Según obra nel espediente del cuartel, unos taben dientro del recintu de la siderúrxica atropando chatarra, mientres otros encargábense de meter el material dientro de coches.

Finalmente, los axentes del puestu de Candás llograron identificar a cuatro persones del grupu: I. J. G., vecín de Corvera de 33 años; y a los avilesinos A. R. G. A., de 26 años; J. B. J. J., de 25; y J. V. S., de 32; a los que-yos atribúin una falta de furtu. Presumiblemente, la valoración de lo robao nun supere los 400 euros.

La factoría sufrió múltiples robos de metal nos últimos años. Ye un focu recurrente pa grupos asemeyaos. Unu de los vixilantes de la multinacional llegó a sorprender en marzu de 2012 a tres mozos, unu d’ellos menor d’edá, cargando nun coche más de 1.000 quilos de fierro, con un valir nel mercáu d’unos 300 euros.

N’otru orde de coses, una empresa allugada nel polígonu de Tabaza I foi denunciada por por vertir hidrocarburos al agua. El departamentu de Mediu Ambiente del Conceyu de Carreño tuvo constancia pola llamada d’un trabayador d’Aqualia na mañana del 5 de mayu. Avisaba qu’había persones baldeando la contorna del portón d’una nave y que presuntamente arramaren aceite y otres sustancies qu’empleguen na actividá industrial. Finalmente, pudo sabese que’l líquidu con restos d’hidrocarburos llegara al colector y d’ehí hasta la depuradora.

La palabra de Peñas

Anunciarse

RES ENTE’L GUARDARRAÍLES

P. F. (Candás)

Naide sabe cómo pero una vaca d’Antromero quedó atrapada nun guardarraíles, al altor d’El Llagarón, sobre los ocho de la tarde del 5 de mayu. La res escapó de la finca onde pastiaba y too paez indicar que quixo saltar a la carretera, pero nun pudo. La Policía Local llegó a intentar sacala d’esi llugar al recibir una llamada del 112, pero nun lo llograron. Finalmente, foi la dueña de la vaca la qu’enguizando algamó que saltara.