Llixeru descensu del alumnáu nos colexos de la Contorna

Ochobre 2014 / EL FARÍN

PAULA FERNÁNDEZ (Peñes)

Los colexos de la contorna sufrieron un llixeru descensu del númberu de matriculaciones  respecto al cursu pasáu. Anguaño hai 1.234 alumnos inscritos nos distintos cursos d’Educación Infantil y Primaria de los centros de Candás y Lluanco, según nel Colexu Rural Arrexuntáu (CRA) Cabo Peñes de Gozón, y les escueles de Llorgozana y Quimarán-El Valle, dambes en Carreño. Son 16 menos que’l cursu pasáu cuando había 1.250.

Carreño ye’l conceyu que más alumnos acueye. El San Félix ocupa la primer plaza de la Contorna con 356 escolares y caltién idénticu alumnáu que’l cursu anterior. Amás, la Conseyería d’Educación desdobló Infantil de cuatro años en dos clases porque hai 27 matriculaos. Mui cerca sígue-y el Poeta Antón con 307 neños y neñes, ocho más que l’añu pasáu. El colexu de la cai Pepe La Mata ye unu de los pocos qu’aumentó’l númberu de matricules. 

Los dos centros candasinos xunto a les escueles rurales contabilicen un total de 684 alumnos, ocho más que’l cursu 2013/14.  Al respective de les escuelines, Llorgozana sumó una matrícula más respecto al añu pasáu (8), mientres Quimarán-El Valle tien cuatro alumnos menos (13). Cabe reseñar que nel primer casu, los neños pueden permanecer na escuela hasta cuartu de Primaria, y nel segundu, hasta rematar el primer ciclu. Depués, pasen directamente a recibir clases nel colexu Poeta Antón, al qu’alleguen en tresporte escolar gratuitu.

Gozón perdió 21 escolares d’un cursu a otru. El colexu La Canal cunta con 14 alumnos menos que l’añu pasáu (134). La Vallina, pela so parte, sigue siendo’l centru educativu con más matriculaos nel conceyu: 354. Nel so casu, perdieron cuatro matricules. El Colexu Rural Arrexuntáu (CRA) Cabo Peñes tamién vio amenorgaes les cifres d’escolarización. De 65 neños pasaron a ser 62, partíos ente dos unidaes en Santiao d’Ambiedes, otros dos en Bañugues, más Cardo, Eres, Llaviana y Verdicio. Estos dos últimes escueles rurales alluguen cuatro alumnos cuando l’añu pasáu había dos más, mientres Eres cunta con seis y Cardo con siete. Bañugues ye’l centru del CRA con más neños: 25 (dos más qu’en 2013/14), siguíu per Santiao d’Ambiedes, que tien 16 (unu menos).

Imaxe d’archivu. Una señora abrocha cariñosamente la cazadora a un neñu del aula maternal na vuelta al cole de 2012. El centru ruempe la tónica del restu y nun para d’aumentar alumnáu, polo que precisa de contratar personal de manera urxente. (P. FDEZ)

El cursu más numberosu, polo xeneral, en cuanto a alumnos se refier, ye Infantil de 5 años, con 152 escolares, anque les cifres son similares a la d’otres edaes. Nel otru llau de la balanza atópense Infantil de 4 años y sestu de Primaria, con 123 y 124 escolares, respectivamente, xuniendo tolos centros de Carreño y Gozón.

POCOS D’OTROS PAÍSES

Per otru llau, los datos apurríos polos colexos y escueles rurales de la Contorna desvelen un simbólicu porcentaxe d’alumnos con raigaños estranxeros: un 1,4%. Solo 17 de los 1.234 alumnos inscritos nes aules de Carreño y Gozón nacieron n’otros países. La Vallina cuenta con tres neños de Marruecos y un peruanu, mientres a La Canal allega una alumna arxentina y otru marroquín. El CRA Cabo Peñes, pela so parte, contabiliza a dos con raigaños en Rumanía, nacionalidá que comparte con tres escolares del Poeta Antón y unu del San Félix. Esti centru candasín del barriu La Cruz caltién nel so llistáu d’alumnos a dos brasileños, unu d’Etiopía y una neña africana. La escuela rural de Llorgozana tamién cunta con un neñu de Marruecos. Na de Quimarán-El Valle nun figura nengún estranxeru