El Conceyu cobra más pol serviciu

de grúa que les principales ciudaes

Carreño marca una tasa de 138 euros, un importe

superior al de Xixón (70), Avilés (75) y Uviéu (84,2)

Febreru 2015 / Carreño

PAULA FERNÁNDEZ (Candás)

El Conceyu cobra más por quitar vehículos cola grúa que les tres principales ciudaes d’Asturies. La tasa axustada na ordenanza municipal númberu 115 ye de 138 euros pa tou tipu d’automóviles, ensin estremar ente motocicletes o camiones nin nel pesu de los coches. Amás, a este importe hai qu’amestar un euru por cada kilómetru que la grúa circule hasta’l depósitu, allugáu al llau de l’área recreativa de la fonte de Los Ángeles. La ciudá asturiana col importe más baxu pola retirada de turismos de menos de 2.000 quilos ye Xixón. La tierra de Xovellanos marca 70 euros de tasa, siguida por Avilés, con 75 euros. La capital, Uviéu, tien un preciu más eleváu: 84,2 euros, pero tampoco algama los 138 de Carreño.

El serviciu de grúa municipal nel conceyu ta subcontratáu a una empresa privada. El conveniu con esta firma marca que tienen que tar nel territoriu de Carreño nos tres meses de branu: aproximadamente dende’l 15 de xunu al 15 de setiembre. El restu del añu, la grúa allega al conceyu previu avisu de la Policía Local pa la retirada de vehículos mal aparcaos. La estadística del cuerpu contabilizó 30 actuaciones nesti sen en 2014. Asina, el Conceyu recaldó por esti conceutu 4.140 euros.

Otra diferencia con otros conceyos ye qu’en Carreño’l pagu d’esta tasa faise a posteriori. Esto ye, un conductor pue sacar el so vehículu del depósitu ensin pagar primeramente los 138 euros. Depués, tendría qu’abonar la cantidá nes dependencies del Consistoriu, como tamién asocede coles multes de tráficu. La contratación de la grúa a una empresa privada foi una actuación criticada pola oposición. Ello ye que’l Conceyu destina a tal fin seis veces más de lo qu’ingresa por ello: «25.000 euros», según los populares. Esti montante sal de sumar los 13.000 euros del costu del tresporte de recoyida de vehículos y los 12.000 que gasten n’arrendar una nave pa guardar los coches.

N’otru orde de coses, les multes impuestes pola Policía Local de Carreño en 2014 fueron 392, lo que supón un amenorgamientu con respecto al añu anterior, cuando hebo 430. La gran mayoría de los infractores beneficiáronse de la bonificación pol pagu anticipáu. En casu de les leves, abonaron 30 euros en cuenta de los 60 que marquen les ordenances fiscales. La estadística policial desvela que solo fixeron 15 recursos de multes. El serviciu opera tres meses al añu, na temporada braniega, «por 25.000 euros»