Número 104. Enero 2014

Xineru 2014 / Gozón

PAULA FERNÁNDEZ (Lluanco) 

Los socialistes denuncien que los suministros nun lleguen a tiempu a les escueles pola morosidá del Ayuntamientu. El portavoz socialista, Jorge Suárez, recrimina al equipu de Gobiernu que les escueles tengan qu’esperar más de la cuenta pa recibir el material destinao al trabayu diariu. ¿La causa? «No han sido suministrados por las tiendas por impagos del Ayuntamiento», xustifica. Dalgunos centros quedaren ensin elementos tan básicos como «bombillas» por esta situación.

La oposición urxe al equipu de Gobiernu que priorice los gastos destinaos a Educación nel conceyu, col envís de caltener el so funcionamientu normal. Jorge Suárez reclamó tamién nel últimu Plenu que los gastos derivaos del comedor de la escuela infantil de 0 a 3 años, que se cuantifiquen mensualmente, sean preferentes «en el orden de prelación de pagos, dentro de la programación de la Tesorería, a través de resolución al efecto, por el Ordenador de Pagos». Asina, los alumnos tendríen garantizaos los menús, p’aliviu de la direición del centru.

Suárez define esta situación como «bochornosa» y encamienta al alcalde qu’habilite una partida específica dientro del epígrafe «Pagos a xustificar» pa los llabores de caltenimientu de los centro educativos «que permita la compra con pago inmediato y no genere esa situación, que afecta al funcionamiento de las escuelas». 

Al marxe d’estos pidimientos por parte de la oposición, les direiciones de les escueles de Gozón pasaron meses esperando a que l’Ayuntamientu ficiera obres nos edificios escolares, como repintar aules, iguar desperfectos o quitar males yerbes de les zones de xuegu. Al final, algamaron el so propósitu.

Otru asuntu pendiente ye la reparación de la cancha cubierta de la escuela La Vallina que ta enllena de goteres. L’edil de Deportes, Manuel Alberto Martínez Matías, quier que’l presupuestu de 2014 tenga una partida pa llevar alantre esa obra.