Númberu 105. Febreru 2014

Alevín: Carmen Sánchez Rodríguez, Carlota Sánchez Calzón, Celia González Gutiérrez, Anne Rodríguez Artime, Isabel Casaprima González, Claudia Martínez Gutiérrez, Inés Barrio García y Marina Argüeso Álvarez. (PAULA FERNÁNDEZ)

Los equipos de voley del Náutico encaren la segunda vuelta nos primeros puestos

Les alevines y cadetes van primeres mientras benxamín A y C tán terceros

Febreru 2014 / Deportes

PAULA FERNÁNDEZ (Candás)

La seición de voleibol del Club Náutico Carreño encara la segunda vuelta de la temporada con cuatro de los sos seis equipos nos primeros puestos. El trabayu de les entrenadores, xunto a la responsable d’esta agrupación deportiva, Dolores García González, más conocida por Lola, fai qu’hasta se plantegaren crear otru grupu na categoría benxamín, onde yá esisten tres con un total de 26 deportistes. Cada partíu xueguen tres integrantes por equipu y non seis como n’otres edaes más avanzaes. «Al final no pudimos porque necesitaríamos más gente para los entrenamientos», valora «Lola».

Les alevines van terceres en la Lliga regular con 11 puntos. Ganaron tolos partíos menos unu hasta la fecha. L’equipu ta iguáu mayoritariamente por deportistes de primer añu, lo que fai qu’esti resultáu seya mui satisfactoriu pal club. La temporada pasada, munches d’elles compitieron na categoría benxamín y quedaron campeones d’Asturies nos Xuegos Deportivos del Principáu nes modalidaes de voley playa y pista. Tamién algamaron la plata na Copa d’Asturies.

Les cadetes tamién van terceres na so categoría con un saldu notable: namás perdieron dos partíos de los siete disputaos esta campaña. «La temporada va regular, podían hacer mucho más», valora Lola. Pero asina, sumen 12 puntos, lo que les alluga a la cabeza na clasificación.

Les benxamines tán dividíes en tres grupos diferentes. San Félix A, iguáu por deportistes que’l próximu añu sedrán alevines, tán na tercer posición de la tabla con 14 puntos. Ganaron seis veces y perdieron dos. Algo parecíu pasa col San Félix C, que tán nel cuartu puestu con 12 puntos, a razón de cinco victories y dos derrotes. Nun corren la mesma suerte les sos compañeres del B, anque hai que reseñar que ye’l primer añu que compiten y cuasi toes tienen siete años, la edá mínima pa xugar al voleibol nel Náutico de Carreño. Nel so casu, salieron victorioses una vegada, pero cayeron nel restu de partíos.