La nuesa Cultura

por XURDE FERNÁNDEZ

Ensin lluz

Echáu na cama depués d’una nueche escesivamente llarga, Salvador sintió la puerta de casa abrise y zarrase. Espiertu, ensin abrir los güeyos, fízose lo más pequeñu que pudo debaxo de les sábanes húmedes pola muga del so cuerpu. Nesi procesu, intentó nun facer nengún ruíu. Apretó los güeyos lo más que pudo col envís de ser a algamar otru suañu na so cabeza pero nada que nun fuera lo que pudiera venir del otru llau de la puerta foi a la so cabeza.

Sintió pasos desordenaos averase al so cuartu pel pasiyu llargu ensin que se parara en nengún de los otros cuartos de la casa. Según s’averaben, Salvador escayeció’l silenciu nel que quería tar y cambió d’estratexa: intentó gritar pa que quien tuviere cerca supiera qu’había xente en casa y que taba espierto, pero nada que nun fuera aire salió pela so boca.

Abrió los güeyos y, debaxo les sábanes, nun vio más qu’escuridá. Zarrólos y apretólos cuando sintió la maniya de la puerta’l cuartu movese hacia abaxo y la claridá del pasiyu foi entrando, adulces, nel cuartu (y tamién debaxo de les sábanes, y tamién na so cara).