107_xurde_temporal

Númberu 107. Abril 2014

Una gran ola alcanza la altura del edificio Palacio, ubicado en La Ribera. (PABLO ARES)

La nuesa Cultura

por XURDE FERNÁNDEZ

Sable que va y vien

Tán socediéndose les galernes nestos primeros meses de 2014 y el sable de les playes que, davezu, vien y va (acompañando’l movimientu de les foles); ta anguaño diendo hacia otros llares. Va y nun vien, mientres les foles sí siguen diendo y viniendo anque con más y más fuerza qu’en munchu tiempu.

En Candás siempre oyí falar d’otros tiempos en qu’en Palmera la playa taba onde anguaño ta’l pedreru y el pedreru onde anguaño ta la playa.

Pero les galernes d’estos díes volvieron más pedreru al pedreru y pedreru al requexu (anque en verdá dalgo más qu’un requexu) derechu de la playa.

Dalgo asemeyao (la falta de sable) pasa tamién nes dunes (que son parte del Paisaxe Protexíu de Peñes) de Tenrero n (ente Verdicio y Podes) y Xagón (ente Podes y Llaviana) con tola perda de natura que conllevaría la so desapaición. Falo namás de les playes que me queden cerca pa poder veles, pero de xuru qu’a otres en Peñes ta pasándo-yos lo mesmo.

Nun sé si’l superpuertu de Xixón tien culpa de dalgo d’esto, pero ta a nada d’aportar el bon tiempu y el sable tien que volver a entrar (nun sé si va poder ser de manera natural, o tendrá que ser de manera artificial), pa depúes, como siempre, y al compás de les foles, dir y venir.