Númberu 108. Mayu 2014

Mayo 2014 / Carreño 
ANTÓN ERES (Candás / Lluanco)

 

Miguel Fernandi «Burilo» ye’l cantante de Skama la Rede, ún de los grupos musicales cimeros de la Mancomunidá d’El Cabu Peñes, que ta a nada d’asoleyar el so cuartu discu, «Avante», espublizáu por Goxe Records. Con él, que foi l’encargáu de tresmitir, hai poques feches, el primer partíu de fútbol n’asturianu na radio autonómica, falamos de la so faceta musical. 

 

–¿Cómo definiría «Avante»? ¿Cómo suena? ¿En qué s’estrema de los discos anteriores? 

–Quiciás ye’l discu más fechu a comuña y más compuestu nel local d’ensayu. Normalmente veníemos col cantar prácticamente fechu dende casa. Esta vez yera namás un bocetu al que-y fuimos dando forma ente toos tanto nes músiques como nes lletres. Amás, ensin llegar a ser un discu conceptual, tengo la sensación de qu’hai una llinia común nes temátiques pesie a nun ser del too buscao. «Avante» nun dexa de ser un pasu más. Creo que sigue la llinia que marquemos dende’l discu anterior «Ye too mentira», pero ensin separtanos del estilu nuestru de siempre. Quiciás agora abusemos menos del ska, pero siguimos siendo un grupu mui folixeru, musicalmente falando. 

 

–¿Qué novedaes trai? 

–Como nos paecía que siete persones enriba del escenariu yera poco, agora somos ocho. Dende va unos meses tenemos a Fabián Díez al trombón, que compartimos con La Tarrancha y Patrulla Dixie, y que nos da muncha más presencia de los metales. Engañémoslu pa que viniera con nosotros l’añu pasáu al Festival d’An Oriant (Bretaña) y agora engañónos él a nosotros pa siguir nel grupu. Amás, pal discu engañemos a Galán «el de Tresona» pa que cantara en «Agora yes tu» y a los candasinos Xuan Rodríguez (Llan de Cubel) y Aida Sánchez pa que tocaren la gaita na nuestra versión de «La casa gris». Pa esti discu, amás, dedicimos remocicar y volver a grabar «Coses de la edá». Ye’l primer cantar que compusimos y sólo lo incluyéremos na nuestra maqueta «Hestories absurdes».

 

–¿Qué temes reivindicáis? 

–Siempre fuimos un grupu internacionalista pero creo que nun sacáremos un discu como esti. Ensin dexar de falar d’Asturies, nesti trabayu falamos de Palestina, Grecia, Cuba, Colombia... de situaciones que-y puen pasar a cualquier persona del mundu. La crisis, la corrupción, los políticos... Hai sitiu pa too nesti trabayu, con lletres más afilaes y directes pa unos cantares y más reflexives pa otros, pero metiendo’l deu na llaga. Nesta situación d’anguaño hai qu’apuntar col deu a los reponsables d’esta estafa que llamen crisis. Peñes nun tien nengún cantar específicu pero los vecinos de la Mancomunidá pueden identificase tranquilamente con cualquiera d’ellos. 

 

–Cuantayá que nun toquen en Lluanco, ¿pa cuándo?

–Nun m’alcuerdo de la última vez que toquemos en Lluanco. Igual foi nel Maite... y otres dos vegaes cuando se montó la Nueche Celta. Habría que pregunta-y al Ayuntamientu. Nun nos contrataron nunca.

MIGUEL FERNANDI «BURILO»

CANTANTE DE SKAMA

«“Avante” mete’l

deu na llaga»

Skama la Rede va presentar un nuevu discu llenu de «lletres afilaes» en Lisboa y Madrid, amás de Candás 

«Burilo» nel Rebolleres Rock. (L. VENTURA)

–¿Con qué se quedaría d’estos 10 años? 

–Son munches coses, podíemos enllenenar el periódicu enteru... Lo meyor ye que siguimos equí, con más canes y menos pelo que’l primer día, pero coles mesmes ganes y esi aquello que xube pel estómadu cuando va entamar un conciertu. La meyor imaxe, el meyor recuerdu siempre ye tar tocando y ver que’l públicu bailla, canta y ta pasándolo bien. Y nun escaería nada porque de lo malo siempre s’aprende. 

 

–¿Yá tienen conciertos cerraos pa 2014?  

–Sí, lo primero va ser el fin de selmana del 9 y 10 de mayu. El vienres vamos repitir conciertu dos años depués del Festival de la Mázcara Ibérica de Lisboa y el sábadu vamos tocar per primer vez en Madrid, na Sala Starving. Tenemos unes cuantes feches zarraes dientro y fuera d’Asturies (esti añu yá tuviemos en Torrelavega, Uviéu y Compostela) que vamos dir anunciando poco a poco. Y en Peñes, claro que vamos tocar. Vamos ser fieles cola nuestra cita nel Rebolleres Rock, asina que’l 26 de xunetu vémonos n’El Prao de Gervasia de Candás.

«Habrá que pregunta-y al Ayuntamientu de Gozón

por qué nun nos contraten»

1/6

¿Cómo leer la

edición impresa

de EL FARO?

La palabra de Peñas

¿Sabe de algún acto en la Comarca y quiere que lo publiquemos? ¿Tiene alguna queja, inquietud o sugerencia?

EL FARO

DE GOZÓN Y CARREÑO

Sede Social:

Calle El Cueto, 14, 3º Izq.

33430 Candás

Carreño (Asturias)

Teléfono: 985 87 25 48

Móvil: 687 979 619

e-Mail: elfaro@elfaro.as

 

DEPÓSITO LEGAL:

LU-305/05

 

Páxines n'asturianu espublizaes cola ayuda de la Conseyería de Cultura del Principáu d'Asturies

© 2005-2021 por VENTURA Y EL FARO S.L. • Prohibida su reproducción total o parcial, aún citando su procedencia, salvo permiso expreso.