Númberu 108. Mayu 2014

Les neñes van tar na fiesta de «Los tigres»

El campeonatu de fútbol 8, agospiáu polos alevines del Victoria, acogerá per primer vegada un tornéu femenín

Mayo 2014 / Deportes

PAULA FERNÁNDEZ (Candás)

El III Campeonatu de Fútbol 8 Conceyu de Carreño, rebautizáu polos propios organizadores como «la fiesta de “Los Tigres”», en referencia al equipu alevín del Victoria de Perlora, tendrá per primer vegada partíos d’equipos femeninos. Manuel Ismael García Gonsálvez, «Cholo», ún de los precursores d’esta iniciativa que nació hai tres años, tien pensao que les neñes del Femiastur, Xixón, Uviéu Modernu y otru equipu del País Vascu compitan en paralelu al tornéu en sí. Esta sedría la principal novedá de 2014, qu’esperen que s’asiente nun futuru.

El campeonatu propiamente dicho, que sedrá’l 24 y 25 de mayu nel sintéticu de La Mata, enfrentará a los grupos alevines de la Cultural Leonesa, Ponte Area, Puente Castro y el Centru Asturianu de Lleón xunto a clubes asturianos como’l Sporting de Xixón, Real Uviéu, Lealtad y, por supuestu, Victoria de Perlora. Queda por confirmar l’asistencia del Avilés y Caudal de Mieres, asina como d’otros dos equipos vascos.

Na primer xornada tienen previsto que los participantes fagan una especie de desfile per Candás «a modo de presentación».

Denomar esti tornéu de fútbol 8 como «la fiesta de “Los Tigres”» nun ye casual. Los organizadores son cuatro padres de xugadores del equipu alevín del Victoria, que consideren que «los chavales se van a enfrentar a equipos con los que igual nunca más jugarán. Es como una celebración, muy bonito, porque hacen piña entre ellos. De hecho, uno de los días van juntos a una comida de hermandad», diz «Cholo».

YÁ VIEN DE LLOÑE

El sobrenome de «Los Tigres» yá vien de lloñe, cuando úna de les madres xaleaba al equipu con esti axetivu. «Vamos tigres», gritaba. Y ye qu’esti grupu de neños participa, amás, n’otros torneos de fútbol 3 de Candás baxo esi orixinal alcuñu.

Los organizadores cuenten col sofitu total del Conceyu de Carreño, que-yos cede gratis les instalaciones de La Mata y otres dependencies municipales. «Por eso el torneo lleva su nombre», subrayen.