110_xurde_folixa

Númberu 110. Xunetu 2014

La nuesa Cultura

por XURDE FERNÁNDEZ

Branu de fiestes

L’antropólogu Roberto González-Quevedo define la fiesta asturiana como «muncho más qu’un momentu pa esparcir y pa disfrutar, ye tamién una práutica cola que se deprenden y s’enseñen, una cierta categorización del mundu y una manera de ver la realidá».

Fiesta podemos considerar los bailles que se facíen los domingos o otru día de la semana. Yeren estos bailles una bona ocasión pa entamar una rellación ente la xente mozo. Pero, amás, n’Asturies avezábase a facer fiestes en casa, con vecinos y amigos, acompañando a los diferentes llabores de llabradores y ganaderos. Cuando se mata’l gochu, cuando s’esfueya, cuando se corcha la sidra, cuando se siega la yerba…, siempre s’acaba la xera con una llacuada.

Nel calendariu del añu hai, amás, díes de fiesta qu’avecen a tar venceyaos colos santos cristianos. De la que va terminando la seronda y l’iviernu celebrábase Santa Llucía, cuando se creyía qu’entraba l’iviernu y entamaben a medrar los díes. Depués veníen Navidá, Santos Inocentes, San Silvestre, Añu Nuevu y Reis. El final d’añu y l’entamu del siguiente ye tiempu d’aguilandu; los mozos piden perres a los vecinos mientres canten, faen una pequeña actuación o faen una comedia.

Pel 17 de xineru avezaba a celebrase San Antón (por exemplu en Perlora o Albandi), santu protector de los animales de la casa. Nesa fecha los trabayadores de la tierra avezaben a llevar a la parroquia carne, güevos…, o dalgún productu venceyáu colos animales. Depués vendríen la Purificación de la Virxe’l 2 de febreru, y San Blas el 3 del mesmu mes. Y llueu l’antroxu.

El branu ábrese en toa Asturies cola nueche de San Xuan, cuando salen a la lluz tolos mitos astures y búscase l’agua que defenda y espante los males, y el fueu (qué sedría esta nueche ensin les fogueres que se salten o se dancen. Depués vendrán les fiestes en cada parroquia dedicaes al santu patrón (por exemplu a San Bartuelu en Viodo o San Llorienzu en Podes). La música de gaita y tambor n’alborada espierta a la xente que, después de los actos relixosos, puyen el ramu, que se fai sobre una estructura de madera en forma de círculu o pirámide decorada con cintes y flores. Pónense nel ramu rosques de pan, panoyes de maíz, botelles de llicor, fabes…

Esti día hai comida grande en casa, con invitaos, familiares o non, que vienen d’otres parroquies y que participen, de la mañana a la nueche, de tolos festexos que, amás de los mentaos na mañana, avezaben a ser na tarde xuegos populares y bailles, siempre con dalguna barraca onde había sidra o otres bebíes.

Tamién había celebraciones que se facíen alredor de los santuarios y capielles dedicaes a la Virxe o a dalgún santu, allugaos en sitios estratéxicos y altos como San Antonio o San Roque en Candás.

El día de la fiesta del santuariu suel haber romería con pelegrinación al santuariu onde hai barraca pa vender bebida, feria, puestos con ablanes y llambionaes, música y baille con gaita y tambor que llegaba hasta la nueche. Nun había fiesta ensin pelea, polo que los mozos avezaben a dir con palos a baillar. Depués de la misa y la procesión llegaba la xinta en casa; los romeros que vienen de fuera avecen a xintar en prau lo que traen de casa.