L’Ocle domina en tierra y mar

El club candasín algamó l’oru por equipos nel XIV Campeonatu d’España

de Biatlón gracies a los buenos resultaos de les sos atletes alevines

Agostu 2014 / Carreño

PAULA FERNÁNDEZ (Lluanco)

L’Ocle domina en tierra y mar. Asina lo demostró nel XIV Campeonatu d’España de Biatlón celebráu’l 5 de xunetu en Lluanco. L’equipu candasín algamó l’oru na clasificación xeneral na categoría alevín gracies a que tres de les sos atletes que participaron na prueba femenina quedaron nos primeros puestos. Nerea García Busto recoyó’l metal dorao al entrar primera en meta con una marca de 4:50, siguida por Natalia Fernández Ferrer (5:01), lluanquina que tamién ye integrante del Ocle. La tercer posición foi pa Lorena Álvarez Verbel (Ciudá de Xixón). La candasina Tábata Serrano Rodríguez, pela so parte, quedó a les puertes del podiu. Ocupó la cuarta plaza rexistrando un tiempu de 5:35. Miguel Estébanez Artime, tamién atleta alevín del Ocle, quedó sestu clasificáu en categoría masculina. Otru de los éxitos de la xornada de biatlón llegó con Juan Ojanguren. L’avilesín afincáu en Lluanco, del Ciudá de Xixón, algamó la segunda posición na xeneral, per detrás de Vicente Trewhela Pfeifer (Penta Terras Lugo). Sicasí, como’l primer clasificáu ye estranxeru, Juan proclamóse campeón de España.

Hebo más atletes de la Comarca que participaron nesta prueba qu’axuntó a deportistes de dellos puntos de la xeografía española como gallegos, cántabros, catalanes, madrileños, lleoneses o vascos.

La lluanquina Claudia Carnero, del Penta Avilés, foi bronce na categoría infantil con una marca de 5:56. La so hermana María, que pertenez al Ciudá de Xixón, tamién subió al podiu en junior, algamando medaya de plata con un tiempu de 17:08. El padre d’estes dos biatletes, Javier Carnero Alonso, lideró la categoría Master B masculina. Esti atleta veteranu, del Penta Avilés, ye tamién entrenador del Atlético Ocle.

El club candasín algamó otros buenos resultaos, como l’oru del veteranu José Muñoz Vega en Master C, la quinta plaza qu’ocupó Jesús Rodil Patricio na categoría Senior masculina y la séptima posición que llogró Enrique Argüelles en veteranos A.

Una buena representación de la Comarca foi al Campeonatu d’Europa de Triatlón celebráu, el 19 y 20 de xunetu, en Setúbal (Portugal). Hasta cinco triatletes de casa se sumaron a los 22 componentes del equipu español. Javier Carnero y José Muñoz ganaron les sos respectives pruebes de master 2 y master 3.

Les hermanes Carnero tamién dexaron altu’l pabellón local. María algamó la plata en Junior A y Claudia quedó a les puertes con un cuartu puestu. Idéntica posición algamó Nerea Busto en «You D», mientres que Tábata Serrano tuvo que conformase con quedar décima na clasificación. Na prueba había tiru al blancu, natación y carrera.