Númberu 111. Agostu 2014

A reventar. Escuela de Odio, Skama La Rede y Reincidentes ficieron que’l públicu baillara ensin descansu. (E. F.)

EL REBOLLERES ROCK, A REVENTAR

Más de 4000 persones disfrutaron d’un eventu que yá ye referencial en Candás y n’Asturies

Agostu 2014 / Carreño

ANTÓN ERES (Candás)

Esti añu’l Festival Rebolleres Rock entamó de vienres cola charra del dibuxante de cómic Ruma Barbero nel Creisi Bar presentando los sos dos últimos cómics («La Chelita» y «Aguantando Cachones»), pero, anque siguirá ganando díes, el sábadu nun dexó un güecu n’El Prao de Gervasia candasín.

Xunto a la mar, ente El Castro y El Cuirno, un branu más volvieron a apaecer el rock, la solidaridá y los gervasios. El prao, a reventar. «Más de 4.000 persones disfrutaron d’un eventu que yá ye referencial en Candás y n’Asturies», esplica l’organización.

El rock colos grupos, Rock’n’guah.es (con neños dende los cinco años de la Escuela de Música de Candás), Escuela de Odio, Skama La Rede (que presentaba’l so nuevu discu «Avante») y Reincidentes ficieron que’l públicu baillara ensin descansu.

La solidaridá tuvo dientro del Rebolleres Solidariu cola collaboración de la Cruz Roja que recoyó cebera y material escolar; amás d’haber h.aima sah.araui, reivindicación de la causa árabe palestina, la oficialidá de la llingua asturiana y la continuidá del festival más allá d’esta llexislatura. «Gracies a los que llevabéis munchos meses esperando que’l festival fuera un fracasu. Tendréis qu’esperar... sentaos. L’añu foi duru pal Rebolleres Rock pol enfotu de delles persones y partíos políticos que namás tienen gana de desfacer y tocar los coyones», dixeron.

Y los gervasios, la moneda oficial del festival, qu’esti añu volvía a cotizar n’El Prao de Gervasia equivaliendo a un euru; anque entá tien qu’esperar un añu pa volver a cotizar na bolsa candasina.