El sociu del Gobiernu quier reciclar más

y suprimir díes de recoyía de basures

Los nacionaliegos creen que lo afayadizo sedría asitiar un poste en cada portal

pa echar los desechos orgánicos que se recoyeríen tres veces a la selman

Agostu 2014 / Carreño

PAULA FERNÁNDEZ (Candás)

Compromisu por Carreño quier reciclar más y suprimir dies de recoyía de basures. Pa ello, creen afayaizu que la Casa Conceyu contrate l’estudio que determine el meyor sistema a implantar en Carreño, partiendo de la premisa de separar el residuo dende l’orixen, y la recoyía puerta a puerta como se fai agora. Lo que podría apareyar la baxa del recibo al nun ser necesariu siete díes a la semana de recoyía. Esti ye ún de los puntos del alcuerdo presupuestario entre’l Gobiernu y Compromiso por Carreño. Roberto Holgado pon l’exemplu d’otros municipios onde escoyeron como modelu el puerta a puerta, con un sistema de postes apegaos a los edificicios y unos gabitos pa depositar los contenedores de cada domiciliu.

El sistema implantaríase de manera gradual entamando pola separación, nun primer momentu, de la materia orgánica, que representa el 40% del pesu total de la basura que se xenera nel conceyu. Nos llugares onde s’impantó’l sistema lograron abaratar el precio del recibo, si bien en Carreño tendrán que ser los estudios los que determinen la frecuencia afayaiza del nuevu sistema.

Ye la segunda vegada que s’intenta llevar alantre un plan pa la recoyía de la basura. La conceyala d’Urbanismu, Cecilia Tascón, anunció en payares de 2012 la intención de suprimir 54 díes al añu la recoyida de basura (incluyendo Navidá y Añu Nuevu) p’abaratar costu. Anque nun señalaba’l día concretu que nun pasaríen los camiones.

Holgado defende que «pal 2020 Unión Europea obliga, al traviés d'una directriz, a que los conceyos reciclen polo menos el 50% de la so basura y el 75% pal 2025. En Carreño recíclase’l 12%, nun vamos algamar esi oxetivu si siguimos asina». La consecuencia de nun llegar a un mínimu de basura reciclao pue, al so xuiciu, repercutir negativamente poles consecuencies de perder accesu a dalgunos fondos europeos.

L’edil de Compromisu esplica que’l primer pasu yá se dió, que ye tener sobre la mesa delles propuestes pa contratar l’estudiu d’imlantacion del nuevu un sistema, pero considera que falta concretar una partida pa llevalu alantre.

Holgado comenta qu’esi nuevu modelu ya ta implantaú en munchos llugares. «En Guipúzcoa hai conceyos onde reciclen el 80% de la basura. Ficiéronlo como una midida pa dir en contra de la incineradora que-yos queríen instalar ellí y, al final, algamaron parar esta instalación», comenta. Esti ye otru de los oxetivos que quieren dende Compromisu, pero pa ello consideren que «la xente tien que ser consciente de que cada bolsa de basura sin separar que tiramos ye alimentu pa la incineradora, y a la incineradora nun hai que dar de comer. Dende casa tamién se llucha escontra la incineradora».