Númberu 113. Ochobre 2014

Detienen a un avilesinu por participar

nuna engarradiella nel Antroxu

El denunciante, de 21 años, allegó al hospital San Agustín con luxación

Ochobre 2014 / Gozón

P. FERNÁNDEZ (Lluanco)

La Guardia Civil detuvo’l 1 de setiembre a un mozu avilesín denunciáu por participar nuna engarradiella nes celebraciones del Antroxu de Branu de Lluanco. D. I. O., de 27 años, afrelló presuntamente a otru vecín d’Avilés, de 21 años, na madrugada del 14 al 15 d’agostu. La víctima punxo la denuncia y apurrió un parte de mancadures a la Benemérita indicando quién fuera’l causante.

Tres l’incidente, el mozu tuvo que ser ingresáu nel hospital San Agustín porque sufriera delles feríes, amás d’una luxación nel costazu

L’Antroxu de Branu d’esti añu saldóse con dellos d’incidentes. Una vecina octoxenaria sufrió unu de los que más consternación causó. Desconocíos llanzaron lladriyos a la vivienda, allugada na avenida d’El Gayo, na que dormía la muyer, provocando la rotura de cristales y, lóxicamente, la medrana de los residentes.

Esa madrugada de fiesta en Lluanco les urxencies nel Centru de Salú tuvieron abondo trabayu. Los facultativos atendieron a delles persones por problemes derivaos del alcohol o por feríes de diversa considerancia. Y ye qu’esa xornada festiva cada vez cunta con más xente. El conceyal de Festexos, Manuel Alberto Martínez Matías, almitió sentise desbordáu pol eventu en sí.