Númberu 113. Ochobre 2014

Gozón C.F. ye’l meyor clasificáu de los equipos de la Contorna, que xueguen en Primera o Segunda rexonal. (P. F. SUÁREZ)

Empieza al ralentín en Rexonal

El Gozón llogra nueve puntos de 18 posibles nel entamu de temporada, mientres el Podes gana ocho con dos derrotes y la mayor goliada

Ochobre 2014 / Deportes 

(Lluanco / Podes / Aboño)

 

Los equipos de la contorna, que xueguen en Primera y Segunda Rexonal, empecipiaron la temporada al ralentín. El meyor clasificáu hasta la fecha ye’l Gozón C. F., que llogró nueve puntos de los 18 posibles nos alcuentros celebraos ente agostu y setiembre. El so primer partíu de Lliga, frente a la S. D. Cualloto, acabó con empate a unos. Tamién fixeron tables les dos xornaes siguientes cola A. D. Llaranes C. F. y l’Atléticu Siero.

 

La primer victoria llegó’l 13 de setiembre en Balbín, por 3 a 1 ante La Guía Norte Astur. El conxuntu lideráu por Jesús «Chus» Naves González va sexto, anque la meta de toos, plantiya y cuerpu técnicu, ye llegar lo más arriba de la tabla posible y evitar derrotes «tontas» como les que vivieron la temporada pasada.

 

El presidente del Gozón C. F., Ramón Artime, empondera’l llabor del míster del club, «Chus» Naves no que va de campaña. «Ahora hace un trabajo más controlado, perfeccionado y desahogado. Esperemos que las cosas salgan mucho mejor», esplicó. Y ye que pa esti nuevu proyectu deportivu cuenta cola ayuda del preparador físicu David González Caminero, lo mesmo que de Ramón García Fernández, quien fai les vegaes de segundu entrenador. Pela so parte, José María Bretón Fernández «Chema» colgó los guantes de porteru la campaña pasada y agora pasóse al otru llau, ayudando a los cancerberos del Gozón.

 

Hai menos xugadores na plantiya del conxuntu gozoniegu que la temporada pasada. Naves cunta con 21 xugadores, ente los qu’hai cares nueves, como Manuel González López, que procede del Bual; Rubén Serrano Labrado, ex del Quirinal; Moisés Díaz, del Llaranes, y dos canteranos del xuvenil del Marino: Adrián Gutiérrez Granda y Adrián Rodríguez Fernández. Xuntos esperen ameyorar les resultancies  pa xugar la promoción, plania Artime. No referente al tema económicu, la entidá almite que vive series dificultaes, sobre manera tocante a los ingresos por publicidá. «Estamos bastante justos porque la gente es reacia a poner publicidad en el campo, y eso a pesar de que damos bastantes facilidades como fraccionar los pagos», comenta’l presidente.

 

El Gozón tamién ganó’l triangular Gómez Lozana, onde s’enfrentó a la Sociedá Cultural y Deportiva Aboño y al Candás C. F., equipu recién baxáu a Rexonal Preferente.

 

El Podes C. F. ocupa’l novenu puestu con ocho puntos en Primera Rexonal, Grupu 1. El conxuntu de José Ramón Méndez Sánchez «Navia» suma dos ganaos, dos empates y dos victories, anque una d’elles memorable. Metieron seis goles frente a unu en casa al C. D. Manuel Rubio, lo qu’anima a siguir peleando pola permanencia.

Héctor Suárez Bayón cunta con 22 xugadores en plantiya y otros dos qu’entrenen col club. Más númberos. 11 futbolistes estrénense nel Podes na campaña 2014/15: Sergio Escudero Menéndez, porteru que vien del Muros; Alberto Edrosa López, ex del Valdesoto; David Busto Iglesias, del Valsa; Silvino García Juanes, antiguu xugador del Gozón C. F.; Adrián Medina Ventureiria, del Miranda; Jairo Arias, que vien del fútbol sala; Pablo Cortés Freije y Jairo Muñiz Rodíguez, dambos ex del Navarro. Completen la llista: Isaac García Sencianes, Marcos Alonso Pajares y Pablo Muñiz Menéndez.

 

Suárez Bayón almite que «stamos contentos con lo que tenemos, aunque se nos fueron jugadores importantes que pasaron a categorías superiores». El futbolista «franquicia» del Podes, va siguir vistiendo la camiseta verdiblanca. Nun ye otru qu’Alejandro Alonso Pajares, que lleva 11 temporaes nel club y viste’l brazalete de capitán.

 

El Podes ye un club humilde que nun cunta con un campu d’entrenamientu en Gozón. Eso sí, estimen al Navarro que-yos dexe’l sintéticu de Valliniello pa nun machucar l’Álvarez Buylla per selmana. Utilicen les redes sociales, como una estratexa pa recaldar fondos esta campaña. «Estamos sorprendidos porque hay muchos negocios de la zona que nos apoyan y eso es de agradecer», diz el míster.

 

 

VICTORIA DE PEÑES, RESPALDU HOLANDÉS

La Sociedá Cultural y Deportiva Aboño estrenó’l 14 de setiembre na lliga con una victoria fuera de casa frente al Marino de Cuideiru por 2 goles a 0. Alberto Fernández Rodríguez «Tuto», nuevu fichaxe que provién del Candás C.F., fixo xubir los dos tantos al marcador. La segunda xornada, otra victoria por 2 a 1 contra’l G. D. Bosco; y la siguiente, más de lo mesmo: 0-4 frente a l’A. C. D. La Luz, lo que los asitia provisionalmente como segundos na clasificación.

 

La entidá, que ta dientro del Grupu 1 de la Segunda Rexonal, fixo 10 fiches nueves, amás de «Tuto», surtiéndose de clubes de la Contorna: Cristian Granda, Alberto Busto y Diego Rionda (los tres del Podes C. F.); Hugo Calvo, Jesús Fernández Rodríguez, Rubén Morales y Rayco Mariño (que provienen del Huracán-Sidrería Nordeste); Pablo García y Diego Escanciano (Villa de Candás Fútbol Sala), y Javier (Victoria de Perlora).

 

El cuerpu técnicu tamién cunta con nueves incorporaciones de casa, como la de Jesús Sánchez Pérez (Huracán-Sidrería Nordeste), anque caltién a otros delegaos como Rubén Gutiérrez Pantiga «Panera». David Rodríguez Tamargo sigue siendo’l míster pa esta campaña qu’empezó a mediaos de setiembre.

 

La directiva, con Evaristo Cuervo Viesca a la cabeza, cuenta col sorprendente respaldu económicu d’un patrocinador holandés: Universeel Slijperij Rotterdam (O. S. R.), que fixo que la modesta economía de la entidá nun cuerra peligru. 

 

El club carreñense más llonxevu ta en plena campaña de captación de socios y espónsor. «Perdimos mucha publicidad del campo», almite’l presidente. Daqué qu’esperen recuperar coles bones resultancies del conxuntu azul, un grupu que cada vez cunta con más futbolistes de Carreño y Gozón.

 

1/6

¿Cómo leer la

edición impresa

de EL FARO?

La palabra de Peñas

¿Sabe de algún acto en la Comarca y quiere que lo publiquemos? ¿Tiene alguna queja, inquietud o sugerencia?

EL FARO

DE GOZÓN Y CARREÑO

Sede Social:

Calle El Cueto, 14, 3º Izq.

33430 Candás

Carreño (Asturias)

Teléfono: 985 87 25 48

Móvil: 687 979 619

e-Mail: elfaro@elfaro.as

 

DEPÓSITO LEGAL:

LU-305/05

 

Páxines n'asturianu espublizaes cola ayuda de la Conseyería de Cultura del Principáu d'Asturies

La plantiya del Aboño ta formada mayoritariamente por futbolistes de Carreño y Gozón. (P. F.)

© 2005-2021 por VENTURA Y EL FARO S.L. • Prohibida su reproducción total o parcial, aún citando su procedencia, salvo permiso expreso.