Númberu 114. Payares 2014

Ondeó otra vuelta la bandera d’España, esta vegada en Centroamérica. (J. CARNERO)

Carnero vuelve del mundial de Guatemala con dos medayes

El lluanquín llogró oru en triatle y plata en biatlón baxo una temperatura de 43 graos y una humedanza del 90%

Payares 2014 / Deportes

PAULA FERNÁNDEZ (Lluanco)

Javier Carnero volvió del I Mundial de Triatle y Biatlón de Guatemala con dos medayes, d’oru y plata, respectivamente. L’atleta participó na competición de triatle, el 9 d’ochobre, baxo una temperatura de 43 graos y una humedanza nel ambiente del 90%, factores que nun consiguieron frenar la so marcha na disciplina qu’axunta carrera, natación y tiru.

¿Cómo foi’l desenvolvimientu de la prueba de triatle? El lluanquín asitióse segundu poco dempués de la primer serie, a cinco segundos del so principal competidor, un atleta alemán. Llogró algamalu nel segmentu d’agua y asitióse a la cabeza na carrera.

Tuvo una penalización de diez segundos na prueba de tiru, por nun tocar cola arma la mesa, como esixen los xueces. Polo que volvió a la segunda posición, xusto al llau d’otru competidor sudafricanu. Entraron xuntos al agua, onde apertaron la velocidá y asitiáronse al empar que l’alemán, hasta que Carnero entainó la velocidá pa volver a la primer plaza.

Yá a la hora de tirar otra vegada, tenía una ventaya de dellos segundos al respective de los sos alversarios, pero volvió recibir una penalización y finalmente salió a la fase final, carrera de 800 metros, igualáu col atleta sudafricanu. Finalmente, llegó a meta primeru, anque confiesa qu’entró «prácticamente desmayado». La xornada siguiente, 10 d’ochobre, volvió a la carga cola prueba de biatlón, amiestu de carrera y natación. El lluanquín tenía les piernes cansaes pol sobreesfuerzu del día anterior y amás, «los mosquitos me hicieron más de 40 picotazos en los pies», unos factores a los que se volvieron a sumar les altes temperatures y la humedanza, yá qu’entrambes competiciones fáense nes hores más caloroses del día: tres y dos de la tarde, respectivamente.

ESGUILAR POSICIONES

De primeres, Carnero asitióse na séptima plaza. La carrera taba siendo liderada por un grupu de sudafricanos y un atleta inglés. Sicasí, el lluanquín esguiló delles posiciones nel segmentu del agua hasta algamar la segunda plaza, per detrás d’un participante de Suráfrica que llogró calzase les zapatielles dos segundos más rápido qu’él. L’últimu kilómetru de la prueba foi un toma y daca ente dambos. Carneru intentaba algamar al so rival mientres ésti daba un cambéu de ritmu p’alloñase. «Esa parte resultó un poco cuesta abajo porque sus piernas eran más largas que las mías. Eso hizo que me volviera a sacar los dos segundos». Carnero colgóse finalmente la plata nesta modalidá.

Dos medayes más pal so palmarés particular. Eso sí, amás de los ésitos llabraos al otru llau del charcu, Carnero epondera l’acoyida nesi país. «Es de destacar el ánimo que me brindó el público de Guatemala».