Númberu 114. Payares 2014

La nuesa Cultura

por XURDE FERNÁNDEZ

Payares

Ochobre acaba calteniendo entá l’aire les castañes más heavy que yo recuerdo. Aire serondiego y calentuzo del sur que fai que siga habiendo más xente qu’otros años na playa cuando ta a nada d’acabar l’añu, cuando tocaba poner l’abrigu. Dicen d’esti aire (que tan bien describió l’escritor Vicente García Oliva nuna novela xixonesa) que ye malu pa los nervios y pa los desvelos nocherniegos; pero’l fríu que siempre llega va acabar llegando anque nun se sabe cuándo.

Son los primeros díes del mes de payares los díes del Sahmain, l’entamu del nuevu añu celta, el final de toles colleches, l’apertura al otru mundu y que’l cristianismu adaptó (como fizo con otres munches fiestes paganes, con munchos sitios de cultu paganu) al so calendariu cola festividá de tolos santos y los difuntos.

Los últimos díes del mes d’ochobre pasélos escuchando una y otra vegada (pela cai, na prensa, nes nueves tecnoloxíes) l’americanización que tamos sufriendo pol halloween y les calabaces qu’apaecen per televisión, centros comerciales y otros sitios de consumu y empobinaos, sobre manera a los neños y neñes. 

Sí ye verdá que la palabra halloween ye una americanización pero non les calabaces, venceyaes col cultu a la muerte, que nos pueblos d’Asturies siempre se tallaron formando cares siniestres, y siempre se-yos colocó una vela dientro nos primeros díes de payares. Halloween básase nel Sahmain celta (los irlandeses lleváronlu nel sieglu XIX a los Estaos Uníos) qu’esistió n’Asturies y que s’estinguió, cuasi dafechu, hai tres o cuatro décades. Agora esi vaciu al que los asturianos sometemos tantes veces a les nueses tradiciones desapaez gracies a Halloween y esto pue ayudar a que se recuperen les vieyes tradiciones perdíes, que se puen amestar a los amagüestos públicos y privaos que se faen nestos díes. Sólo nos queda que toos nos pongamos a que nun perdamos esta segunda oportunidá que se-y da al Sahmain. Por eso, y mientres nun se demuestre lo contrario, gracies Halloween.