Númberu 117. Febreru 2015

Natalia Fernández acompañada nel podiu por Nerea García y Carmen Perrino. A la derecha, Ana Fernández, nel caxón más altu. (V. FDEZ.)

Peñes domina na «city»

Atletes de les categoríes alevín e infantil de Carreño

y Gozón ganen nes San Silvestres d’Avilés y Xixón

Febreru 2015 / Deportes

PAULA FERNÁNDEZ (Lluanco / Candás)

Peñes domina na «city». Atletes alevines y infantiles de Carreño y Gozón cerraron 2014 con seis podios nes San Silvestres d’Avilés y Xixón.

Los hermanos afincaos en Lluanco, Guillem y Natalia Fernández Ferrer (Atlética Avilesina), algamaron la medaya d’oru nes sos categoríes (alevín y infantil, respectivamente) na carrera avilesina del 31 d’avientu, que se celebró pela redolada de la Casa Conceyu, y tuvo entamada pol Club Avilés Atletismo. Él percorrió 1,2 kilómetros en cuatro minutos y 26 segundos, mientres la so hermana fixo una marca de 4:01.24 na distancia de 1,6.

Natalia xubió a lo más alto del podiu acompañada nos otros dos caxones por atletes del Club Náutico Carreño. Nerea García Busto, que foi segunda n’infantil, nun yera la primer vegada que corría la San Silvestre d’Avilés. Participa na prueba dende los seis años (agora tien 12). Nesta ocasión, llogró medaya de plata, anque-y costó, yá qu’almite que «el recorrido era complicado porque había cuestas muy duras». Carmen Perrino Pérez quedó tercera. L’atleta candasina yá participara na San Silvestre l’añu pasáu, anque «no me salió bien porque no había entrenado suficiente y, además, estaba mala».

Nesta ocasión, esforcióse enforma pa preparar la carrera colos sos entrenadores y llogró bonos resultaos. Depués, aprovechó que yera’l día de Nuechevieya pa celebralo en Candás cola mio familia de Xixón y Uviéu. Eso sí, gustára-y batir a «nuestra eterna rival»: Natalia Fernández Ferrer.

Ana Fernández Menéndez, tamién del Club Náutico Carreño, impúnxose na prueba alevina femenina con una marca de 4 minutos y 49 segundos. El so oru na prueba avilesina ye otru más pa guardar na so vitrina personal.

Per otru llau, Tábata Serrano Rodríguez quedó tercera n’infantil femenín n’otra San Silvestre, la celebrada en Xixón. L’atleta candasina del Club Náutico Carreño ye asidua a participar en pruebes populares como ésta, amás de competir federada cola entidá del so conceyu dende va dellos años. ¿El so balance? «El resultado sabría mejor si se tratase de una carrera importante, aunque estoy contenta».