Número 104. Enero 2014

Operarios del Consistoriu avisen que trabayarán

con ropa de cai

Los trabayadores d'Obres llancen esta midida de protesta tres dos años esperando por nuevos uniformes

Xineru 2014 / Carreño

PAULA FERNÁNDEZ (Candás)

¿Acabarán cavando zanxes en vaqueros? Los operarios del Ayuntamientu alvierten de que trabayarán con ropa de cai a partir de 2014 en casu de que nun lleguen los nuevos uniformes como midida de protesta.

Los empleaos del Serviciu d’Obres lleven dos años esperando por camisetes, pantalones, chaquetes y botes. El conveniu llaboral afita que’l Consistoriu debe renovar la mayoría d’estes prendes una vez al añu pa cumplir les normes de seguranza nel puestu de trabayu.

El pasáu mes de marzu, funcionarios y equipu de gobiernu caltuvieron una xunta para sentar les bases de la convocatoria. «Pedían trajes con unas características como para ir a la Luna y por eso no se presentaron empresas al concurso», creen.

Los empleaos d’Obres añaden que’l conveniu regula que l’Ayuntamientu «tiene que entregar la ropa nueva antes del 31 de mayo y aún no ha llegado». Esta problemática, al so xuiciu, débese a «un tema de desidia por parte del Gobierno municipal».

¿Cómo ta la situación anguaño? Unos empleaos trabayen con prendes reglamentaries y otros «vienen con ropa de hace 20 años, cuando el aparejador municipal y el Jefe de Obras obligan a que toda la plantilla vaya uniformada», aseguren.

El conveniu afita que les prendes tienen que renovase cada añu. (E. F.)

Les quexes van más allá. Y ye que los interinos, que cubren places del Plan d’Empléu Local, tienen indumentaries de peor calidá que’l restu. «Tendríamos que ir todos iguales porque ellos también aguantan el frío y las mojaduras como los demás», conseñen.

La solución más drástica sedría trabayar con ropa de cai, lo que podría llegar a desencadenar un problema de seguridá llaboral. «Si un operario sufre un accidente por ir sin prendas visibles y con franjas refractarias, a ver quién carga con la culpa», alvierten.

Al so criteriu, lo que deberíen facer ye «sacar a concurso el contrato de ropa para varios años y así se aseguran que llegue a tiempo».